KRALENDIJK – Djadumingu 3 di desèmber, e federashon di beisbòl ‘Nos Ke Nos Por’, a hasi entrega di premio na un kantidat di mucha ku a partisipá na nan torneo.  Fundashon Wega di Number Boneiru(FWNB), konhuntamente ku federashon di beisbòl ‘Nos Ke Nos Por’, a yuda pa organisá un torneo ku a karga e nòmber ‘Si Nos ke Nos Por’. 

FWNB tabata e patronisado mas grandi. Kuater organisashon a partisipá na e torneo. Ta trata di The Dreamers, Stars, WolfPack i Padres, un tim di Rincon. Kategoria nan a kuminsá for di U4, U6, U8, U9, U10, U12 i U 14. E torneo a kuminsá 27 di òktober i a finalisá 26 di novèmber. Dia 3 di desèmber, a finalisá ku e parti di entrega di premio. Tambe riba e dia tabatin show di Sanikolas i su pitnan mei mei di tur e muchanan. E torneo a dura 5 siman, hopi bon na nivel, notabel adelanto grandi serka e muchanan. Weganan tabata hopi pèrta ku tenshon pa mira kua tim ta gana. U6 i U8 a demostrá ku nan a desaroyá hopi i ta stabil den e deporte. 

300 mucha

Alrededor di 300 mucha a tuma parti pa medio di nan tim na e torneo. Organisadónan di The Dreamers ta hopi satisfecho kon tur kos a kana. Weganan a bai segun skema, ta trata di 70 wega di kada tim, durante 5 siman. Resultado: Den U14 Wolfpack, U12 The Dreamers, U10 Stars i U9 Wolfpack. Aparte di esnan menshoná, tabatin diferente premio mas ku a entrega na e aktividat final di e torneo.