KRALENDIJK—Fundashon Mariadal djabièrnè 8 di desèmber a estrená 2 ambulans nobo na prensa. Ambulansnan nobo por tuma 1 hende drumí, kompará ku esnan aktualmente den uzo tin oportunidat pa 2 persona drumi na mes momentu.

A menshoná ku pa hopi aña a uza di esun di 2 kama i nunka a hasi uzo di ámbos kama. Esun nobo awor ta mas espasioso i dimes tin situashon ku mas ku un hende mester di atenshon médiko, por bai ku 2 òf 3 hende den e ambulans, na mes momentu. Esei si ta loke sa sosodé na sierto okashon na Boneiru, ku ta transportá 1 persona drumi i otronan sintá den e ambulans pa tratamentu.  Awor tin 2 ambulans nobo ta remplasá esnan ku ta den servisio. E ambulans nan ku ta den servisio ta keda stashoná na kantu, si akaso ta nesesario, den futuro por hasi uzo di nan.

Shandro Susana kende tin 23 aña traha komo shafer di ambulans a bisa: “E ambulansnan avansá aki a yega resientemente i promé ku nos empleadonan di Emergensia kuminsá ku nan entrenamentu, nan ta haña un preparashon.

“Na aña 2021 a kuminsá e proseso pa e ambulans nan nobo. A bin un eksperto for di Hulanda i a kore na Boneiru i nota kua vehíkulo ta apropiá pa Boneiru. Kada ékis kantidat di aña, ta pone un vehíkulo nobo den servisio”, asina Susana a splika.

Rincon

Segun Susana a sigui splika, awor empleadonan ta bai trein i konosé e ambulans nobo, pa yanüari 2024, pone nan den servisio. Dos ambulans ta sufisiente pa e kantidat di hende ku ta biba riba e isla. No ta bai tin ambulans stashoná na Rincon. A hasi prueba i esei no ta nesesario. Momentu ta nesesario nan lo yega rápido posibel na kada sitio. Ambulans nan tin motor V6. Momentu nan ta pará den garashi, ta pone koriente na e vehíkulo, esaki pa mantené ekiponan sendé. Pues  loke hende ta pasa i mira dilanti hospital, no ta trata di kargamentu di bateria di e ambulans.