KRALENDIJK – INDEBON ta organisá huntu ku diferente federashonnan di deporte un eksposishon deportivo grandioso ku lo tuma lugá riba 9 i 10 di mart 2024. Intenshon di e eksposishon aki ta pa mustra i promové tur deporte ku ta hasiendo na Boneiru. Den un intento pa oumentá e partisipashon na deporte riba e isla, muchanan ta haña e oportunidat pa haña eksperensia den diferente deporte i asistí na demonstrashonnan.

Den preparashon pa e eksposishon deportivo INDEBON a organisá e siman aki un enkuentro, kaminda representantenan di tur federashon deportivo tabata presente. Meta di e eksposishon deportivo no ta solamente pa mustrá e deportenan, pero tambe pa laga hubentut partisipá aktivamente na diferente aktividatnan di deporte. E federashon- i klupnan a uni forsa pa kompilá un programa variá i interaktivo.

Pa duna tur hende e oportunidad pa partisipá, INDEBON ta pone bùsnan disponibel for di Rincon i for di diferente sitio riba e isla. E kantidat di aktividat- i demonstrashonnan ta dependé di e kantidat di federashonnan partisipante. E organisashon ta enfatisá ku kada deporte ta ofresé posibilidatnan úniko pa e hubentut di Boneiru i ta spera ku e evento aki lo kontribuí na un komunidat mas salú i aktivo.