KRALENDIJK – Aktualmente na Boneiru no a hospitalisá ningun pashènt ku Covid-19. Asina dòkter Michael Mercuur, hefe di departamento di Salubridat Públiko ta duna di konosé. “Na BonLab i na e laboratorio di Fundashon Mariadal no tin un oumento di infekshon respiratorio, manera Covid-19. Serka e dòkternan di kas tampoko. Nos ta den kontakto estrecho ku nan”, segun deklarashon di Mercuur.

Na Boneiru no tin persona den hospital tampoko pa motibu di grip.  Aruba i Kòrsou tin hopi pashènt den hòspital ku Covid-19 òf grip. “Pa e motibu akí hendenan na Boneiru ta puntra nan mes kon e situashon ta na Boneiru. Nos situashon ta favorabel, pero nos tin ku tene kuenta ku esaki por kambia. Prinsipalmente pa motibu ku tin hopi tráfiko entre Boneiru, Aruba i Kòrsou.”

Tin hende ku por bira gravemente malu si nan haña grip òf Covid-19. Ta trata di hende grandi i hende ku tin un malesa ku no ta kura. Por ehèmpel hende ku diabétis, malesa di pulmon, malesa di nir, malesa kardiovaskular i pashènt ku kanser. E konseho na e hendenan akí ta pa bai pasa e angua kontra corona.

Esaki por ku sita riba djaweps for di 10:00 or te 12:00 or na departamento di Salubridat Públiko na Kaya Gilberto F. Croes 24. Por traha sita via e number grátis 0800 0800. Hende ku tin un salú débil por pasa e angua di grip serka nan dòkter di kas.

Un persona ku tin keho manera kentura, tosamentu i keho di nanishi i garganta, por sòru pa no kontagiá otro hende. Ta importante pa tene distansia, ventilá tur espasio bon, laba man regularmente i tosa òf nister den èlebog. Si e kehonan ta bira mas serio rápidamente i un hende ta haña difikultat pa hala rosea òf ta bira konfundí, e persona akí mester bai ‘huisartsenpost’ mesora. Òf e tin ku bai ayudo di emergensia.