KRALENDIJK- Gobièrnu di Boneiru ku haña un mihó bista riba su prosesonan interno, pa loke ta trata impuestonan insular. 

Esaki diputado Clark Abraham a splika den konferensia di prensa djabièrnè último. Abraham a splika esaki riba preguntanan di prensa lokal, si ta bèrdat ku gobièrnu Insular lo ke tuma responsabilidat bèk pa kobra su propio impuestonan. 

Abraham a indiká ku realmente ta Belastingdienst Caribisch Nederland (B/CN) ta esun ku a terminá e protokòl ku tabata tin, bou di kua nan ta kobra impuesto pa Boneiru. Mientrastanto, segun e diputado di finansas a splika, a yega na prolongashon di akuerdo pa 1 un aña, ku posibilidat ku lo yega na un akuerdo di mas durashon. 

“Loke sí mi ke bisa ku ta apsolutamente nesesario ku Boneriu haña un mihó bista di su situashon di impuesto. Hopi kos no ta kana bon, proseduranan mester wòrdu deskribí i evaluá”, asina Abraham a bisa. E problemátika no ta nobo, pasombra ta algu di hopi tempu ku gobièrnu insular no tin su propio asuntonan pa loke ta trata impuesto bon reglá i kontrolá.

Kaha

E diputado a mustra su mes krítiko tambe ku desishon di B/CN pa kita nan funshon di kaha. “Antes tabata asina ku, pa pago impuesto di outo por ehèmpel mester a mustra papel di seguro. Sin esaki, no por a paga impuesto di vehíkulo. Pero ora bo no tin un persona sintá na un kaha òf lokèt, esaki no ta posibel”.