WILLEMSTAD – Diputado Nina den Heyer tabata presente na e di dos konferensia di trabou di SEA a tuma lugá djaweps i djabièrnè na Kòrsou, unda tur isla di Karibe i Hulanda a partisipá. SEA, òf Aliansa Edukashonal Stratégiko, tin komo meta primario stimulá éksito den estudio i chèns igual pa studiante karibense. Ademas, a presta atenshon tambe na e prioridatnan di e proyekto SEA.

Durante di e konferensia, a tene vários pènel i seshon di trabou ku meta pa stimulá éksito akadémiko di studiantenan karibense. E enfoke tabata riba un mehorashon di transishon di skol sekundario pa MBO/SBO. Tambe a para ketu na e tres puntonan di atenshon di SEA, manera fasilitashon di mobilidat pa studiante den Reino, un programa preparatorio pa studiante ku ta deseá di kuminsá ku un edukashon universitario, i investigando un mihó konekshon entre edukashon i e merkado laboral.

Tantu skolnan sekundario komo skolnan di mbo/sbo di Karibe a partisipá, banda di algun skol hulandes. Ademas, studiantenan for di henter Reino a partisipá aktivamente den e konferensia di trabou i tabatin kontribushon balioso na e diskushonnan i aktividatnan di SEA.

Fortifiká

E konferensia di trabou di SEA tin komo meta pa krea un plataforma pa kompartí konosementu, eksperensia i ‘best practices’. E meta final ta pa fortifiká edukashon i oumentá oportunidatnan pa tur studiante karibense.