KRALENDIJK – Sùrfernan Boneriano a eksperensiá un situashon pekuliar na Aeropuerto Internashonal di Aruba. Ora nan kier a kue nan maletanan a resultá ku nan no tabat’ei. Segun Duana di Aruba nan mester a pasa ku nan propio sèt di sùrf via despacho di Duana, promé ku nan por a haña e ekiponan aki. 

‘T’asina ku boso por rebendé e ekiponan aki’, lo ta un motibu, segun Pieter Zweers, ku e duanero tabata di opinion ku e ekiponan mester a pasa via despacho di duana. Mas sùrfer Boneriano a haña nan ku e mésun problema ku Zweers riba e djamars en kestion 7 di mei. “Mi ta bini aki mas ku 30 aña pa partisipá na Aruba Hi-Winds. Tur ora mi ta bai ku mi ekiponan. Nan ta den un tas rondó grandi. Esaki ta prome biaha ku mi a hañami konfrontá ku e regla aki”, segun un Zweers ku tabata klaramente asombrá.

Pa por a partisipá tòg na Aruba Hi-Winds, un evento di sùrf ku ta organisá di 8 te 13 di mei, e sùrfer mester a paga na tur 786,95 florin Arubano (437 dòler) pa tres persona. “Esaki ta pekuliar. Pasobra mi ekiponan no ta nobo. Bo por mira esei. Sinembargo mi no a logra di konvensé e duanero. El a keda para riba su punto”, segun Zweers.

Sèt di sùrf no ta na Aruba

Ora ku Zweers a kaba paga e 768 florin, e por a kana bai depósito kaminda su ekipo lo mester tabata. “Ora mi a yega einan, mi kosnan no tabat’ei. Kiko a pasa? Pa deskuido Z Air a sigui bai ku mi ekipo Kòrsou. Mi ta kere ku si mi no a paga, ku un dia despues mi lo por a haña mi kosnan gewon. Pasobra esei tabata e kaso tambe ku un di e otro sùrfernan. E no a paga, pero por a bin buska su ekipo gewon su siguiente dia. Danki Dios mi tin nan atrobe den mi poder i mi por partisipá na e evento”.

E organisashon di Aruba Hi-Winds ta bai tuma kontakto ku duana ku e speransa ku nan por regla algu ainda pa e sùrfernan Boneriano ku nan a pèrhudiká. Zweers: “E organisashon tabatin kontakto ku duana. Ta wardando awor riba kontesta di e hefe. Ban spera ku nos ta haña un kontesta positivo. Si esaki sigui sosodé e próksimo añanan na Aruba, anto esaki lo ta e último biaha ku mi a partisipá na Aruba Hi-Winds”.