KRALENDIJK – E direktiva di Fundashon Mariadal a trose bèrdat na vários okashon den nan esfuersonan pa saka e kompania lokal Medicair afó, pa asina trese un kompania stranhero aden. 

Den dianan ku a pasa e asunto di Air Ambulance a bira un tema aktual atrobe, despues ku Ministerio di Salubridat, Bienestar i Deporte (VWS) porfín a intervení, i a firma un akuerdo temporal ku e mesun Medicair BV pa asina sigurá al ménos e transporte di naturalesa di urgensia entre e islanan ABC. 

Esaki pasombra e buelonan aki no por wòrdu ehekutá pa e kompania Sarpa, ku ta e kompania ku a wòrdu kontratá pa Mariadal i ku ta establesé na oòlombia, ku diferente konsekuensia pa loke ta e operashon di ambulans aéreo den region. 

E promé kaminda ku Mariadal a trose e bèrdat ta  ora direktor Giovanni Frans a bisa públikamente ku Mariadal i Sarpa tabata tin tur e pèrmitnan nesesario pa bula tur kaminda, o en todo kaso no solamente entre Boneiru i Colombia, pero tambe entre e islanan di anterior Antia Hulandes. 

Frans a asta pone esaki tambe pretu riba blanku den un karta ku ela manda pa Kolegio Ehekutivo, ora nan a kuestioná Mariadal spesífikamente riba e punto aki. Loke ta hasi esaki èkstra pikante ta e echo ku no ta ekiboká Frans a ekiboká su mes. Tin vários dokumentu -bayendo bèk te na aña 2020- kaminda ekspertonan a sigurá Frans pretu riba blanku ku Mariadal ni Sarpa tabata tin e pèrmitnan nesesario, i ku tabata poko  plousibel ku nan lo por haña esaki algun momento den futuro. 

E di dos kaminda a trose e bèrdat, ta un momentu promé ku e fecha kaminda a kontratá Sarpa. Na diferente okashon, entre otro den un konferensia di prensa dia 14 di òktober 2022, Frans a indiká ku ministerionan Hulandes a eksigí pa remplasá Medicair, ku ta registrá lokalmente, pa un operador ku ta karga registrashon Hulandes PH riba su avionnan. Apesar di petishonnan ekplísito pa esaki -entre otro tambe for di kolegio di gobièrnu di Boneiru- nunka Mariadal no a presentá ni un solo prueba òf dokumentu pa sostené esaki. Entre tantu, ta resultá for di deliberashonnan entre Gobièrnu di Boneiru ku e ministerionan konserní, ku di nan banda nan a siguré ku nunka no a pone e eksigensia aki riba mesa serka Mariadal.

AOC

E di tres kaminda ku a trose e bèrdat di parti di gerensia di Mariadal ta e informashon ku entretantu e hospital lo a apliká pa haña un propio Sertifikado di Operador Aéro (AOC) na outoridat di aviashon hulandes. Un fuente hopi bon informá den e materia aki ta konfirmá na ABC Online Media ku un tal petishon ainda no a ser entregá. 

Además, ta bisando tambe ku e probabilidat ku Mariadal, komo hospital, lo por haña e pèrmit aki mester wòrdu konsiderá komo chikutu. Outoridatnan di aviashon rònt muntu, pero partikularmente na Hulanda tambe, ta pone eksigensianan basta pisá pa loke ta trata operadornan ku ke bin na remarke pa operá un operashon aéreo. Entre otro, nan mester demostrá nan konosimentu i kapasidat den e área di operashon di avion, mester tin por lo ménos un avion propio, i tambe mester por mustra ku nan tin sufisiente medionan finansiero pa no solamante establesé un kompania di aviashon, pero tambe pa mantené esaki pa un tempu prolongá ku manteshon na òrdu i mas rekesitu. 

Sorpredente

Hopi opservadó ta sorprendé pa e echo ku gerensia di un instututo manera Mariadal por trose bèrdat na e forma ku nan a bin ta hasi pa ku e materia di ambulans aéreo aki, sin ku esaki aparentemente tin algun konsekuensia pa e personanan konserní, i sin ku institutonan di supervishon sea interno, manera un hunta di Supervishon, òf supervishon eksterno, manera Inspekshon di Salubridat, ta tumando pasonan kontra di e trosementu di bèrdat aki.