KRALENDIJK – Algun siman atras, e smak straño, hopi biaha deskribí komo un smak kímiko di webu produsí lokalmente tabata tópiko di diskushon riba Medionan Social na Boneiru. 

Ounke ku hopi hende tabata di akuerdo ku e krítika, otronan a bisa ku nan no a ripará nada i ku tin hende ta zùr pa falta di otro kos di hasi. 

Un investigashon di Fundashon Tienda pa Konsumidó Boneiru (FTPKB) a hasi awor ta duna rason na esnan ku tabata keha. E fundashon a tuma kontakto ku e produsente Punta Blanka Farms, kaminda a revelá ku un empleado lo mester a usa e desinfektante Creoline pa limpia e área kaminda e webu tabata wòrdu wardá. Pasó ku kaska di webu ta poroso, e holó i smak chikí di e Creoline a drenta den algun webu, segun FTPKB a splika.

Destruí

Punta Blanka di su banda a bisa ku mientrastantu a destrui tur e webu afektá, despues ku nan a bira konsiente di e problema. Segun e produsente, ya pa mas ku dos siman no tin mas webu na benta ku a wòrdu afektá pa loke ta trata e smak. 

Den konsultashon ku FTPKB, a yega na akuerdo mas aleu pa mehorá e kalidat i seguridat di e webunan. “Aki kuater luna, e produsente lo tin un stèmpel ku ta indiká fecha di produkshon i fecha di vensementu. Ademas, e karton di webu lo kontené informashon di kontakto relevante, manera informashon di kontakto di e produsente,” segun tienda pa konsumidó a bisa.