KRALENDIJK – E siman aki a tuma lugá e Kurso Básiko Sindikal Boneiru, ku a bira realidat dor di koperashon entre AFBW,  Federacion di Trahadornan di Aruba (FTA) i Centro di Formacion (CENFOR).

E kurso tabata tin un durasahon di tres dia. E kurso a enfoká riba diferente temanan esensial pa ku e ròl di shopsteward den un organisashon kaminda tin representashon sindikal. A trata entre otro historia sindikal, filosofia sindikal, ideologia sindikal i étika sindikal. 

Aparte di teoría, tambe a tuma lugá diferente ‘role play’ pa praktiká ku situashonnan ku por bini dilanti den organisashonnan, kaminda miembronan di sindikato tin ku intermediá

Entrenadó

E kurso a tuma lugá na Divi Flamingo Resort Bonaire, kaminda Hubert Dirkz i Tyron Bremo di CENFOR tabata enkargá ku fasilitashon di e kurso. Por a nota tambe presensia di vários kabesante di AFBW, manera Norwin (Nòchi) Willem, i sindikalista di promé ora na Boneiru, Ewald Abdul. 

Na final di e kurso a entregá sertifikado na tur e partisipantenan, ku sin eksepshon tabata hopi entusiasmá ku e loke a siña den e 3 dianan tras di lomba.