KRALENDIJK – Fin di siman ku a pasá Marchena a hunga pa e tim di sòftbòl The New Radiator. Ku su tim el a kue djadumingu anochi e título di sòftbòl ‘Torneo Si nos KE, Nos POR’ na parke Jossy Boekhoudt. Un detaye notabel. Cicilia-Marchena ta biba na Boneiru.

“Mi a kuminsá hunga sòftbòl dia mi tabatin 32 aña. Mi a siña e deporte slow pitch na Den Haag serka The Rock Angels i  fast pitch serka Eurostars na Capelle aan den Ijssel. Entretantu mi ta hungando awor pa sinku aña kaba”, Cicilia-Marchena ta konta. Algun aña despues e deportista a muda pa Boneiru. I ku 37 aña e ta aktivo ainda. Cicilia-Marchena no ta hunga na Boneiru so. Wikènt pasá el a hunga pa un ekipo miksto na Kòrsou ku a partisipá na Boneiru na un torneo internashonal.

Wikènt ku a pasa Cicilia-Marchena a hunga den un ekipo miksto di hòmber i muhé. Foto: ABC Online Media

“A puntrami pa hunga den un ekipo na Kòrsou, pasobra nan a mira talento den mi,” e ta splika. “E eksperensia ku e ekipo di Kòrsou, The New Radatior, ta formidabel. Nan ta dunami konfiansa i ta lagami hunga sin tenshon. Mi ta haña hopi konfiansa di nan”.

Djadumingu anochi e Boneriana a kue e título máksimo ku su ekipo di Kòrsou.

Internashonal

Na Boneiru Cicilia-Marchena ta hunga serka Yellowbirds. Nan a pidi’é spesial pa hunga pa e ekipo na Kòrsou fin di siman ku a pasa. No ta keda te einan. E slow-pitcher ta hunga ku Bonaire  Angels – e ekipo ku bo por kompará ku e ekipo nashonal di sòftbòl – na torneonan internashonal. El a hunga na Aruba kaba. E luna benidero e ta bai Sint Maarten ku Bonaire Angels.

Cicilia-Marchena no ta mira e echo ku fin di siman pasá el a hunga pa un ekipo di Kòrsou komo un situashon straño: “Loke mi a bisa kaba, nan ta dunami konfiansa. Esei ta dushi. Ora The New Radiator ta hunga na Kòrsou, mi ta bini einan tambe. Nan ta paga mi biahe i estadia. Na luna di yüli tambe mi ta partisipá na un torneo grandi ku nan na Kòrsou. Mi gusta e deporte hopi i ta orguyoso ku loke mi a logra kaba. Ku mi ta biba na Boneiru i ta hunga pa un ekipo na Kòrsou, no ta importá. P’ami esei ta trese e islanan mas serka di otro”.