WILLEMSTAD – Neuroscience Awareness Network Foundation UMENTE, Stichting Multiple Sclerose Curaçao, Fundashon Alton Paas i NASHKO a uni forsa pa organisá e promé Summit Karibeño riba Desòrdu Neurológiko: Desaroyo den Tratamentu, Kuido i Inklushon. 

E evento ku ta enfoká riba kondishon neurológiko manera ataka selebral (CVA), dwarslaesie, i multiple sklerosis, lo tuma luga di 1 te 3 di Novèmber 2024 na Curaçao Marriott Beach Resort.

E meta di e Summit ta pa mehorá signifikantemente e salú i bienestar di esnan na Kòrsou i den e región Karibe ku ta sufri di desòrdu neurológiko. E prevalensia di esaki ta subiendo. Segun neurologia lokal 1 hende ta sufri un ataka serebral tur dia na Kòrsou. E desòrdunan aki ta króniko i ta trese daño na e nèrvio, seso, i wes’i lomba, ku ta kousa varios reto di salú, inkluí mobilidat limitá, difikultat ku balansa i sensibilidat, i komplikashon ku hala rosea, tripa i blas.

E impakto sosial di e desòrdunan neuologiko aki ta hopi grandi i ta afektá no solamente e hende ku sufri di nan, pero tambe nan kuidadónan, famia, i komunidat na un grado mas amplio. E pashèntnan mester kuido kontínuo, sea den un institushon òf na kas, i nan ta eksponé na riesgo di problema sekundiario manera pulmonía, preshon den wesu riba kueru (decubitus), i malesa di kurason. Además, nan kapasidat pa partisipá den e merkado laboral ta limitá, ku tin un efekto negativo riba e situashon socio-ekonómiko di e isla. E Summit ta subrayá e nesesidat urgente pa maneho di gobièrnu pa garantisá inklushon i sosten pa e personanan aki den nos sosiedat.

E meta prinsipal di e Summit Karibeño ta pa kreá un plataforma kompletu pa atendé e asuntu di desòrdunan neurológiko aki i pa promové avanse den tratamentu, kuido i inklushon sosial. E evento interdisiplinario aki lo reuni profesionalnan médiko, trahadónan di maneho, grupo di abogasia, pashèntnan, kuidadónan, i otro partínan envolví pa un diskushon holístiko riba manera pa mehorá e resultado pa esnan ku ataka serebral, dwarslaesie i multiple sklerosis.

Pa e Summit aki nos tin 6 oradó internashonal for di Hulanda, Belgiko, Canada, Uruguay i Aruba ku lo presentá 10 tópiko di importansia. Nos tin 14 eksperto lokal, inkluyendo personanan ku lo komparti nan mes eksperiensa ku e kondishonnan aki.

Un programa amplio di tópiko, bou di kua investigashonnan médiko di mas resien, inovashonnan den tratamentu, kuido di pashèntnan, i strategia pa mehorá inklushon sosial. E Summit aki no ta solamente un foro mediko, pero un plataforma pa trese konsenshi riba e desafio di tur dia ku e personanan ku desòrdunan neurológiko ta enfrentá na Kòrsou i den Karibe. E evento ta trata pa haña mehoransa pa salú, kalidat di bida, i e kapasidat pa integrá kompletamente den sosiedat.

1 – 3 di novèmber

E Summit lo tuma luga den Curaçao Marriott Beach Resort for di 1 te 3 di Novèmber 2024. E seremonia di apertura lo kuminsá pa 7:00 anochi dia 1 di Novèmber 2024. Registrashon ta disponibel via e website ofishal di e Summit: www.neurocaribbeansummit.com. 

E komité organisadó ta invitá publiko, personanan ku ta sufri di desòrdu neurologiko i nan famia, profesionalnan di kuido i tur otro parti interesá pa asistí i kontribuí na e dialógo importánte aki. Personanan ku un desòrdu neurologiko i nan kuidadonan ta haña un trato speshal i por registrá via e website.