KRALENDIJK – Orguyosamente Tourism Corporation Bonaire (TCB) a representá Boneiru na e Travmedia’s International Media Marketplace – IMM 2025, ku a tuma lugá dia 23 di yanüari na New York City. IMM ta un evento di ret mundial ku ta trese e industria di biahe den kontakto ku periodistanan, redaktornan, influencernan i emisoranan prominente. Den kolaborashon ku su ofisina di relashonnan públiko, Diamond PR, TCB a hasi uso di e evento pa destaká Boneiru su eksperensianan sobresaliente i pa edifiká relashonnan signifikante ku medionan di komunikashon.

Nos isla su partisipashon na IMM 2025 a aksentuá e esfuersonan pa personalisá e ‘eksperensia Boneiru’ i desaroyonan nobo i eksitante pa e aña akí a keda introdusí. Banda di esaki a laga tur hende mira kiko nos isla tin di ofresé. TCB a hiba mas ku 20 kòmbersashon personal ku representantenan di medionan di komunikashon renombrá manera USA Today 10Best, Lonely Planet, Travel + Leisure, BBC Travel, Forbes i mas.

TCB i su partnernan na nos isla ta preparando nan mes tambe pa djòin e Travel & Adventure Show e wikènt akí na New York. Seis partner lo presentá nos isla na e feria komersial akí. E show ta planiá pa tuma lugá den e Jacob K. Havits Concention Center dia 25 i 26 di yanüari 2025.