KRALENDIJK– Negoshinan ku kier pone bòrchi òf otro opheto den espasio públiko, pronto lo tin ku pidi permit i paga e tarifa ku ta pertenesé na un permit asina, segun Entidat Públiko Boneiru (EPB) a komuniká den transkurso di djaluna.

Ounke ku ofisialmente semper mester paga pa uza espasio públiko—manera teras, bòrchi ku propoganda òf otro opheto EPB lo bai reforsá i kolektá e asina yamá “tarifa di prekario.”

Bou di un akuerdo di implementashon pa aña 2025, Direkshon di Supervisión i Mantenshon, Dienst Ruimte & Ontwikkeling,  (DRO), JAZ i Kuerpo Polisial Karibe Hulandes (KPCN) lo kolaborá pa asugurá kumplimentu. Ophetonan manera sèn, mesa, bòrchi, mata I baki di mata I piedra no por wordu poné riba tròtuar òf otro espasio públiko, sin  aprobashon eksplísito. EPB ta nota ku no ta solamente pa por kobra pa esaki, pero tambe pa motibu di ku ophetonan por ta un peliger pa seguridat. Banda di esaki, kier trata tur negoshi na mes manera.  

Liña di tempu

Kuminsando na febrüari, OLB lo kuminsá ku e esfuersonan di mantenshon. Te ku ora ei, negoshinan lo tin oportunidat pa kita ophetonan no autorizá òf asigurá pa pidi permitnan nesesario. Falta di kumplimentu ku relgla por resultá den but òf kitamentu di e ophetonan aki na man di outoridat.