KRALENDIJK- Djamars 28 di yanüari 2025 den oranan di mainta, kòntròl multidisiplinario di ‘ondermijning’ a tuma lugá na 2 diferente lokalidat riba sospecho di violashon di lei i regulashon pa loke ta trata residensia i trabou  di estranheronan.

Pa medio di e kontròl multidisiplinario a chek si esnan presente na e lokalidatnan aki ta den poseshon di e dokumentonan obligatorio  i a hasi kontròl riba otro lei- i regulashon di e diferente partnernan di kadena.

Durante e kòntròlnan no a konstatá violashon dirèkt.  A haña indikashon ku ainda mester bai investigá. E partnernan di kadena ta bai hasi mas investigashon di e asuntu aki a base di e resultadonan.

E siguiente partnernan a forma parti di e kòntròlnan aki: Inspekshon di Labor, Kuerpo Polisial Hulanda Karibense, Koninklijke Marechaussee, Servisio di Imigrashon i Naturalisashon CN, Direktorado di Supervishon i Mantenshon di entidat públiko Boneiru i Ministerio Públiko BES den kolaborashon ku ‘Regionaal Informatie – en Expertise Centrum Caribisch Nederland’ (RIEC CN).