KRALENDIJK – Siman pasá, Direkshon di Vigilansha & Hustisio (DT&H) di Entidat Públiko Boneiru (EPB) i Fundashon Tienda Pa Konsumidó Boneriano (FTPKB) a sera un akuerdo pa bai traha huntu pa mehorá e protekshon di konsumidó na Boneiru.

E enfoke nobo, ku ta bai drenta vigor den masoménos 3 siman, lo konsentrá riba edukashon pa negoshante i inspekshonnan físiko na negoshinan. E meta ta pa informá negoshante tokante reglanan legal i kòntròl di preis, asigurando ku konsumidónan ta benefisiá di práktikanan komersial hustu.

DT&H ta enfatisá ku kolaborashon ku partner manera FTPKB ta esensial pa logra un impakto mas grandi. Alabes, lo apliká un trato firme kaminda nesesario, ku sankshonnan pa negoshinan ku ta hasi nan mes kulpabel di violashon. “Nos ta yuda kaminda posibel, pero nos lo aktua tambe ora mester. E konsumidó boneriano meresé protekshon,” segun DT&H a bisa.

Ku e kolaborashon, ambos partido ta  spera di promové transparansha i konfiansa na komunidat Boneriano.