KRALENDIJK – Boneiru ta enfrentando vários problema di tráfiko ku ta eksigí akshon urgente, segun hefe di polis Alwyn Braaf. E hefe di polis a papia abierto di e desafionan ku e isla ta konfrontando, manera molèster di zonido di motornan, kore ku personanan den baki di vehíkulo i menornan di edat tras di stür. “Nos no ta hiba apsolutamente un maneho di toleransia,” Braaf ta enfatisá, mientras e ta referí na e preukupashonnan di komunidat.

E molèster di motor ta un problema kresiente segun hopi habitante riba e isla, spesialmente den e barionan kaminda nan ta keha di e molèster i kenshinan peligroso. “Nos ta hasi sinseramente un yamada riba e  motosiklistanan pa tene kuenta ku nan ko-siudadanonan,” segun Braaf. “Mas bien hendenan grandi tin molèster di esaki. Asina ta krea hopi molèster di zonido. Tambe nos ta mira ainda hopi hende ku ta buta ‘fever’ riba kaminda públiko. Ta un molèster hopi grandi. Pero pa nos ta hopi difísil pa kontrolá.” A krea un sitio na Onima kaminda motosiklistanan por entrená seif, pero e atrakshon di kaminda públiko ta keda grandi. Spesialmente riba djadumingu ta mira hopi motosiklista ku ta okashoná molèster riba kaminda públiko anto sin hèlm. 

Kore ku bentananan blindá i sin faha di seguridat

Pero no ta e problema di motosiklistanan so ta un problema grandi pa polis. Kore ku bentanan blindá ta segun Braaf un tereno shinishi, ya ku no a finalisá e lei tokante esaki kompletamente. “Pareu ku tin klaridat, nos lo mantené,” e ta agregá. “Algun tempu pasá a entregá un kambio di lei na konseho insular. Eiden mester disidí kuanto porshento bo tin mag di blinda un bentana. Tanten ku no a tuma un desishon riba esaki, nos no por pasa pa mantenshon.” Den e plan di aña nobo di polis ta tene kuenta tambe ku korementu sin faha di seguridat, kore ku personanan den baki di outo, meskos ku uzo di telefon selular ora ta stür.

Polis no ke konsentrá su mes na pone enfoke riba kòntròlnan preventivo so. “E informenan a yega serka nos tambe ku e pueblo ke mira mas aktividat konhunto di kòntròl. Pues nos ta bai traha riba esei sigur. Di otro banda eksperensia a siña nos tambe: kon efektivo bo ta e ora ei? Bo ta hasi esei e ora ei pa un presentashon? Òf bo ke atendé di bèrdat por ehèmpel ku e koredó di skuter burachi? Un meskla di e dos kosnan aki bo por spera sigur den 2025,” segun Braaf.

Menornan di edat i mortonan den tráfiko

Menornan di edat ku ta stür tambe ta un tendensia preukupante, ku konsekuensia fatal tin biaha. Braaf a mustra riba e nesesidat di responsabilidat di mayor: “E ta kuminsá na edukashon tambe.” E ta rekordá riba aksidentenan trágiko kaminda shofùrnan hóben tabata enbolbí. “Ami lo no laga mi yunan menor di edat kore outo. Tampoko pa bai toko pa buska algu lihé lihé.”

Raportahe di aña i perspektivanan

E raportahe di aña di polis ta sigui enfatisá e peligernan di kore bou di influensia. Ku solamente un aparato pa supla na Boneiru e kapasidat ta limitá. “Nos ta orguyoso ku loke nos tin, pero e kresementu di e poblashon ta pidi pa ampliashon,” Braaf ta deklará. Polis na Boneiru ta pará dilanti di retonan konsiderabel, spesialmente ku e pensamentu ku e poblashon kada luna ta sigui krese hopi. Sinembargo nan ta desidido pa mehorá e siguridat den tráfiko. “Nos ta keda pone stap pa garantisá e siguridat riba kamindanan di Boneiru,” hefe di polis Braaf ta sigurá.