KRALENDIJK – A otorgá e aña aki e premio di rekonosementu anual, lokual su intenshon ta pa enfatisá e kontribushonnan positivo den komunidat,  na un fundashon ku ta dediká su mes na e komunidat di Boneiru. Djarason anochi Leonard Domacassé, Direktor General di Maduro & Curiel’s Bank (MCB) Bonaire N.V. a entregá e premio na balor di 5000 dòler. 

Evert Piar, presidente di e fundashon, ku a risibí e premio, tabata hopi orguyoso ku e rekonosementu. “Esaki ta atrobe un rekonosementu pa loke nos ta hasi pa e komunidat i Boneiru,” segun e presidente. E fundashon a produsí prestashonnan remarkabel ku medionan limitá, manera organisashon di un simposio grandi tokante kuido di demensia ku oradónan internashonal. “Nos simposio i e investigashon di demensia tabata algun di e puntonan kulminante di e aña ku a transkurí,” e ta agregá.

Ku e premio i e rekonosementu ku nan a risibí Fundashon Alzheimer Bonaire ta spera di por sigui amplia su trabounan, en partikular riba tereno di akohida i entrenamentu pa e personal di kuido. “Nos mester di fondo pa mehorá nos programanan i sigui ku nan,” Piar di e fundashon ta enfatisá.

Rekonosementu spesial

Señor Noel Janga tambe a risibí un rekonosementu spesial di MCB pa su trabou boluntario den komunidat. Riba propio inisiativa Janga a kuminsá ku limpiesa di sitionan riba e isla, lokual a hala atenshon i sosten di komunidat. Kada djasabra e ta organisá awor akshonnan di limpiesa kaminda hopi siudadano ta partisipá. “Pa e bunita ehèmpel ku e ta duna i su kontribushon na medio ambiente riba nos isla, nos ke duna señor Noel Janga e rekonosementu aki,” Domacassé ta deklará. Janga a risibí un bale na balor di 2500 dòler.