KRALENDIJK – Na final di siman pasá a tuma lugá un interkambio entre UNESCO, Kenniscentrum Immaterieel Erfgoed Nederland (KIEN), Nederlandse UNESCO Commissie (NatCom NL) i representantenan lokal di UNESCO ku  Konseho Insular(KI) i Kolegio Ehekutivo di Boneiru. 

E meta di e reunion tabata pa presentá Konseho Insular i kolegio ehekutivo na UNESCO i kompartí informashon tokante e ròl i tareanan di e organisashonnan presente. 

Durante e reunion, a duna atenshon spesial na e kambionan di membresia pa Boneiru despues di 10-10-10 i na e implementashon di proyektonan bou di guia di KIEN i Natcom. Kada organisashon a hasi un introdukshon, siguí pa un interkambio di opinion balioso entre e bishitantenan, miembronan presente di Konseho Insular , miembronan di Kolegio Ehekutivo i griffie. 

Ademas, a papia tokante kon e metanan di UNESCO por wòrdu realisá mihó den e konstelashon aktual di Boneiru. Durante e reunion tambe a enfatisá un biaha mas kon spesial ta ku e palu mas bieu di Reino Hulandes ta na Boneiru i ku esaki tin mas di 1000 aña. Esaki ta suprayá un biaha mas kon importante ta e kompromiso di Boneiru pa ku konservashon di naturalesa i patrimonio kultural.

Patrimonio kultural

E interkambio aki ta nesesario pa informá Konseho Insular tokante tópikonan importante den sosiedat. Pa medio di e reunionnan aki, e miembronan di  Konseho Insular ta keda informá di desaroyonan relevante i por tuma desishonnan ku ta kontribuí na futuro di Boneiru, ku bista tantu riba patrimonio kultural komo desaroyo sostenibel.