KRALENDIJK – Relashoná ku e anunsionan resien tokante invershonnan den infrastruktura na Boneiru, a bini mas klaridat tokante disponibilidat di e 16 mion ku a primintí anteriormente. Riba pregunta di redakshon di Bonaire.nu ta resultá ku a menshoná e montante na 2024, pero ku e medionan no ta disponibel ainda pa Kolegio Ehekutivo di Boneiru. E motibu pa esaki ta ku Eerste Kamer mester aprobá ainda e presupuesto kaminda e montantenan aki ta aparesé.

Despues di e aprobashon aki numa por traha un desishon i Boneiru por disponé realmente di e medionan. Segun e partidonan enbolbí ta trahando palabrashon awor tokante e invershon i ehekushon di e plannan. “Ta importante ku ta bini plannan konkreto, pa evitá ku ta keda sin uza e sèn,” segun e bosero di Relashonnan di Reino. 

Koperashon i vishon riba término largu 

Den un konferensia di prensa anterior sekretario di estado Zsolt Szabó a enfatisá e importansia di un aserkamentu struktural di e problemanan ku infrastruktura na Boneiru. Einan a sugerí ku e sekretario di estado mes lo a tuma akshon. Den realidat e responsabilidat ta di Kolegio Ehekutivo di Boneiru.  Szabó ta suprayá si ku e ta haña importante ku ta atendé mas rápido ku ta posibel e problemanan ku e kareteranan i ku Boneiru mester wak e sosten nesesario for di Hulanda riba término largu.

E sekretario di estado a mustra riba e medionan ku a pone disponibel kaba, manera e 13 mion euro di Regiodeal, ku entre otro por uza pa mehorashon di infrastruktura. Kon lo bai uza e 16 mion euro èkstra ta dependé di e palabrashonnan ku ta sigui entre Boneiru i gobièrnu Hulandes.