KRALENDIJK – Stichting Zorg & Welzijn Groep (ZWG), Ministerio di Salubridat, Bienestar i Deporte (VWS) i Stichting Cocari II (Cocari) a firma un akuerdo di kooperashon pa realisá un sentro di kuido residensial na Boneiru. Bou di e título provishonal ‘Nos Bario’, ta bai desaroyá un sentro ku kapasidat pa 108 hende grandi basá riba e prinsipio di desaroyo di embehesimentu aktivo, koheshon sosial & privasidat i inklushon di naturalesa i kultura. E inisiativa akí ta marka un paso importante den mehorashon di kuido pa hende grandi na Boneiru.

Boneiru tin un falta di kama di kuido pa hende grandi. Enbehesimentu ta oumentá, miéntras e kapasidat eksistente no ta sufisiente pa kumpli ku e nesesidat kresiente pa kuido. Pa e motibu ei ZWG, komo dunadó di kuido rekonosé pa VWS, i Cocari, komo desaroyadó eksperensiá, ta uni forsa pa realisá un solushon ku preparashon pa futuro.

“E sentro di kuido residensial akí ta hopi nesesario i un promé paso sumamente importante pa mehorá kuido pa hende grandi na Boneiru,” Genara Timp Silberi, direktor di ZWG ta bisa. “Mes momentu esaki ta un reto grandi tambe, spesialmente ora ta trata reklutamentu i entrenamentu di sufisiente personal kualifiká. Huntu ku tur partido enbolbí, nos lo sigui traha riba esaki.”

Herbert Barnard, direktor di programa Zorg en Jeugd Caribisch Nederland na VWS ta di akuerdo: “Ta tremendo ku nos por a hasi un komienso ku e kooperashon akí pa e fasilidat nobo akí ku ta altamente nesesario pa hende grandi na Boneiru”.

Konsepto di bibienda sostenibel i inklusivo

Nos Bario ta bira mas ku un sentro di kuido residensial: e ta bira un ambiente di biba den kua hende grandi por enbehesé kedando aktivo, koheshon sosial i privasidat ta den balansa i naturalesa i kultura ta hunga un ròl na un manera integrá. Esaki ta nifiká ku e diseño i e fasilidatnan ta kuadra ku nesesidatnan di hende grandi, ku atenshon pa espasio komun i privá, elementonan natural den ambiente i un konekshon fuerte ku kultura boneriano.

E arkitekto boneriano Carlo Abdul ta diseñá e sentro di kuido residensial. Ku su konosementu i eksperensia, el a krea un diseño ku ta kuadra perfektamente ku e estilo di bida i kultura di Boneiru. Pa sigurá ku e sentro di kuido residensial ta kumpli optimalmente ku deseonan i nesesidatnan di habitantenan i nan famianan, a organisá seminario i seshon di trabou ku e grupo di enfoke i partnernan. E enkuentronan akí a produsí idea balioso ku ta bai inkluí den e siguiente fase di e proseso di diseño.

Danki na e sosten aktivo di Kolegio Ehekutivo, Nos Bario ta haña un lugá sentral den e plannan pa kuido pa hende grandi i desaroyo espasial na Boneiru.

Siguiente pasonan

Pa konstrukshon, Entidat Públiko Boneiru (EPB) a pone un tereno disponibel ku ta keda entre Kaya Mendelssohn i Kaya Calixo. E tereno akí ta ofresé un sitio sentral pa e sentro di kuido residensial, loke ta hasié fásilmente aksesibel pa habitante, famia i personal di kuido.

Diputado di Espasio & Desaroyo, Anjelica Cicilia, ta enfatisá e ubikashon úniko i e diseño sostenibel di e proyekto: “Nos Bario no ta bira djis un sentro di kuido residensial; e ta bira un ehèmpel kon naturalesa i nos kultural por bai man den man ku fasilidatnan moderno di kuido. E sitio ta ofresé no solamente un ambiente di bida trankil i agradabel, sino tambe un solushon duradero ku ta kuadra ku e vishon di término largu di Boneiru.”

Diputado di Komunidat & Kuido, Nina den Heyer, ta enfatisá urgensia di e proyekto akí: “Frankamente e situashon relashoná ku bibienda pa hende grandi na Boneiru ta preokupante i urgente. Nos ta mira ku e demanda pa bibienda i fasilidat di kuido adekuá ta oumentá rápidamente, miéntras e kapasidat aktual no ta sufisiente. P’esei mi ta kontentu tambe ku huntu ku Ministerio di VWS i nos partnernan ZWG i Cocari, nos por dal e paso importante akí pa ofresé nos hendenan grandi un ambiente di biba digno i adekuá. Ademas e enfoke spesial  di ‘enbehesimentu aktivo’ ta esensial pa kalidat di bida di nos hendenan grandi i ta kontribuí na un komunidat salú i komprometí.”

Tokante e partnernan di kooperashon

* Ministerio di Salubridat, Bienestar i Deporte (VWS) pa loke ta trata maneho i finansa ta responsabel pa kuido di hende grandi na Hulanda Karibense. VWS ta sostené realisashon di e sentro di kuido residensial komo parti di un maneho mas amplio pa mehorá infrastruktura di kuido na Boneiru.
* Stichting Cocari II (Cocari) ta desaroyadó di e sentro di kuido residensial i tin eksperensia amplio ku proyektonan na Boneiru dirigí riba hende grandi. Pa un tempu kaba, Cocari i ZWG ta traha huntu na Rincon, kaminda ZWG ta dunadó di kuido i Cocari doño di e kompleho di Cocari.
* Zorg & Welzijn Groep (ZWG) ta un dunadó di kuido rekonosé na Boneiru i ta responsabel pa eksplotashon di e sentro di kuido residensial. Pa basta aña kaba, e organisashon ta duna servisio di kuido i bienestar na hende grandi na Boneiru i ta hunga un ròl klave den desaroyo di kuido pa hende grandi ku preparashon pa futuro.