KRALENDIJK – JICN, SGB i Fundashon Forma huntu ta ofresé un formashon nobo di MBO 2 pa kòki. Kuater detenido motivá, ku anteriormente a haña nan diploma MBO 1 Hóreka, Alimentashon i Industria di Alimentashon den JICN, a kuminsá e formashon di dos aña aki. E inisio ofisial a tuma lugá dia 30 di yanüari.

Dosentenan di Fundashon Forma ta duna e lèsnan i ta kai bou di SGB. E detenidonan tabata warda hopi tempu pa e oportunidat aki i ta kontentu ku e formashon a kuminsá den 2025. Nan ta sigui lèsnan di teoria un dia i mei pa siman i ta haña eksperensia práktiko den kushina di JICN.

Despues di finalisashon, e partisipantenan ta risibí un diploma MBO 2. Esaki ta amplia nan oportunidat pa haña trabou despues di nan detenshon. E formashon aki ta un paso nobo den e kolaborashon entre JICN, SGB i Fundashon Forma pa duna mas oportunidat di edukashon na detenidonan.