KRALENDIJK – Siman pasá Inspekshon di Enseñansa tabata na Boneiru pa evaluá e diferente unidatnan di SGB. 

Durante un bishita asina Inspekshon ta wak entre otro kalidat di e enseñansa, e klima na skol i e kuido pa studiante. Nan tabata enkantá ku e desaroyonan denter di MBO i a duna henter e tim kòmplimènt. 

Inspekshon a papia di un MBO digno ku hopi kualidat empresarial: ‘Nos ta mira un tim entusiasmá. Dosentenan ta sinti nan mes parti di un totalidat profeshonal i tin bista pa e studiantenan. Den klas tin trankilidat i energia positivo.’ Durante e bishita a papia ku maneho, tim di dosente i studiante. Tambe a asistí lès. Serka studiantenan Inspekshon a mira kompromiso, siguridat i satisfakshon: ‘Un diferensia grandi for di algun aña pasá.’

Despues di e bishita Liset de Keijzer, direktor di unidat di MBO Bonaire, a dirigí su mes na e tim kompletu: ‘Mi ta sumamente kontentu ku Inspekshon ta duna nos kòmplimènt pa e desaroyonan ku nos ta pasa den dje. Tur dia mi ta mira kon duru nos ta traha pa prepará studiantenan pa sektor empresarial na Boneiru. Nos ta krese i floresé!’ 

Na aña 2018 Inspekshon di Enseñansa a otorgá e marka di kalidat ‘kalidat básiko’ na MBO Bonaire. Ku e karakterístika ei e skol ta kumpli ku tur eksigensia di kalidat di Inspekshon i nan por pone nan mes riba mesun liña ku skolnan MBO na Hulanda. Awor tambe MBO Bonaire ta kumpli ku tur e eksigensianan di e marka di kalidat.