KRALENDIJK–Fin di siman ku a pasa, Contour Global a hasi donashon na ‘Bonaire Wolfpack Basball Foundation’(BWBF). Ta trata di kantidat di material importante, nesesario pa praktiká e deporte di beisbòl ku e muchanan. Na e okashon, presidente di BWBF,

Anthony Ignacio, tesorero Kumar Piar, i otro miembronan di e fundashon, naturalmente e muchanan tambe, a ekspresá kon kontentu nan ta ku e materialnan ku nan a risibí. Contour Global a kere i a mira e seriedat den nan fundashon i a aseptá nan petishon ku brasa habri pa regalá nan material pa e deporte. Awor por sigui desaroyá mas den e deporte, nan a menshoná. 

Di parti di Contour Global, tabata presente Alvin Hellburg i Juliette De Grijze, nan a splika ku nan tabatin algu èkstra i a koperá ku e muchanan, pa kontribuí na nan desaroyo  den e deporte di beisbòl. “Nos sa ku BWBF ta hopi aktivo ku e muchanan i nos a koperá un bes sin pensa. Kaminda tin seriedat nos ta yuda loke ku por.”Despues a saka potrèt ku tur loke Contour Global a regalá BWBF.