KRALENDIJK- Periodista i eskritor Bòi Antoin ta hopi rabiá pa e sistema ku Fundashon Mariadal ta trata ku siudadano ku tin ku buska remedi na un di e botikanan ku ta wòrdu manehá pa Fundashon Mariadal. 

Antoin tabata asina fadá ku e situashon ku ela deklará riba su Feisbook, ku e ta bai buska guera ku e fundashon pa nan falta di servisio. “Fundashon Mariadal ta un abusadó!”, asina Antoin a skibi.

“Esei ta mi opinion, esei ta mi konklushon, mirando kiko ta pasando na botika na Antriol, Botika Korona. Mi tin tres siman kaba, via otro hende, ta buskando pa yega na turno pa haña remedi preskribí na Botika Korona, ku ta kai bou di Fundashon Mariadal. Awe tabata di tres intento. Mientrastantu mi remedinan a kaba”, asina Antoin a skibi. 

Manera Antoin ta nota korektamente, pa algun luna kaba ta sumamente difísil pa haña remedi na Boneiru. “Habitantenan di e isla aki ta pasando den un kataklismo, un kalvario, pero ta guli manda abou. No por sigui asina. Ami ta bai tuma akshon!”, asina Antoin a primintí.

Bai guera

“Entrante awe mi ta bai guera kontra Fundashon Mariadal, ku ta e úniko responsabel pa e situashon aki. Un akshon no solamente kontra asuntu di botika, sino kontra tur situashon ku no ta kuadra den e servisio ku Mariadal ta supone di duna na komunidat.

Antoin ta termina bisando ku ta parse ku Boneiru a para bira manera pais di tèrser mundo. “Nos no por sigui wanta abusu asina aki”. 

Arogante

E keho públiko di Antoin ku algu ku hopi hende na Boneiru ta rekonosé. E kos mas pió ta ku Fundashon Mariadal te asina leu no a ni hasi un intento di esfuerzo pa bin splika pueblo, kiko e problema ta i ki solushon por spera riba un termino kòrtiku. 

Te asina leu a saka solamente komunikado di prensa ku a anunsiá siere di e botika na hospital, i tambe kambio den orario di esun na Kaya Korona. No a bin duna klaridat kiko tin tras di henter e problematika aki pa hende por komprondé, ni a pidi un deskulpa públiko pa e situashon ku ta parse di bai den mal en peor ku kada dia ku ta pasa. E falta di duna splikashon òf almenos tuma responsabilidat públiko, lo ta lo ménos ku e poblashon tin derecho riba dje, pero ta parse ku Fundashon Mariadal tin un arogansia enorme, ya ku tin monopolio riba hopi kos na Boneiru, i hende simplemente no tin eskoho si no di bai na amèn di e manera ku Fundashon ke hasi su kosnan. 

Si ta Bòi Antoin den todo kaso, esaki lo mester yega na su fin pronto. 

Mientrastantu ta komprondé ku den seno di gobièrnu di Boneiru tambe ta halando atenshon di e ministerio responsabel na Hulanda, ku te asina leu tambe ta laba man so i no ta ni rekonosé ku tin un problema, te pa nan splika kon ta bai solushoná esaki.