KRALENDIJK – E kompania di sikólogo Linkels & Partners lo ta na Sint-Eustatius i Saba e próksiko dos simannan pa un estudio ku ta ehekutando na nòmber di e unidat SZW di RCN i e ministerio di Asuntonan Sosial i di Trobou (SZW). 

E estudio tin komo meta pa midi kon siudadanonan ta eksperensiá e servisio di e unidat aki. Klientenan di SZW ku ta risibí pago òf benefisio manera kontribushon pa yu, AOV i AWW, ònderstant ètsetera, ta wòrdu entrevistá den kuadro di e estudio. Tambe lo papia ku doñonan di trabou pa loke ta trata pago pa malesa (ziektegeld) i sosten finansiero ku a risibí den kuadro di e pandemia di COVID-19. E estudio di e forma aki ta ofresé siudadano e oportunidat pa ekspresá nan opinion tokante servisio di SZW. 

Segun e direktor di Linkels & Partners, lo usa diferente método pa ehekutá e estudio. “Nos lo hasi uso di entrevista individual, enkuestanan ònlain, pero tambe asina yamá gruponan di enfoke, kaminda mas kliente ta deliberá huntu tokante vários tópiko”. Linkels ta bisa ku e informashon ku ta wòrdu duná pa kliente lo wòrdu tratá di forma konfidensial. “Pa nos ta importante kiko ta eksperensia i opinion di kliente, pero lo no indiká nunka ken a bisa kiko”.  

For di luna pasá klientenan a wòrdu yamá dor di e unidat SZW pa sondea ken lo ke partisipá den e estudio. For di esaki a hasi un selekshon i for di dia 17 di mart a kuminsá ku gruponan di enfoke na Boneiru. Esnan presente a koperá di forma aktivo i ku entusiasmo, asina Linkels & Partners ta komuniká. E resultadonan di e estudio den luna di yüni 2022 lo wòrdu presentá na SZW. 

Persona i doñonan di trabou ku tambe ta interesá pa partisipá den e diferente enkuesta òf gruponan di enfoke tambe por tuma kontakto pa indiká nan disponibilidat pa esaki. Pa esaki por tuma kontakto sea ku Harald Linkels òf Judith Brekelmans via di e number di telefon 7178711, pa medio di un e-mel pa [email protected], òf dor di manda un Whatsapp pa Judith Brekelmans riba e number +5999 516 7652. Brekelmans lo ta na Sint-Eustatius di dia 21 pa dia 26 di mart, i na Saba for di 27 di mart te ku dia 2 di aprel.