KRALENDIJK- Dia 19 di mart 2022, Tirabon un bes mas a organisá un torneo di e deporte tiru manera ta kustumber. E bia aki e nòmber di e torneo tabata, “Flatten the curve- COVID”. E tema aki a wòrdu skohé relashoná ku e pandemia di e vìús di korona ku a asota mundu. Den un forma simbóliko tiradónan deportista partisipante a trata na kaba ku e vìrús di korona i Gandy a sa di mandé plàt.

Riba fecha di e torneo, wer tabata parsialmente nublá ku algun spat leve di áwaseru lokal. Bientu tabata supla generalmente For di direkshon ost i moderá te basta fuerte; forsa 4 te 5 (20 te 39 km/ora, 11 te 21 nudo).

E Parkour ku a skohe pa e torneo tabata “practical shooting” riba 5, 10, 15 i 25 meter di distansia ku sierto opstakulo den kaminda uzando un kombinashon di pistol i rifel, kaliber 9mm i .22 largu. E sponsor prinsipal pa e toreo tabata Best brands Bonaire. Premionan tabata pa terser lugá, un gift card na balor di 25 Dollars, segundo lugá, un kaha di e bebida energante yamá Monster i pa e ganador apsoluto, un gift card na balor di 75 Dollars. 

Premio

Na di terser lugá a sali Quinlan de Lanoy, Theursten Winklaar a bai ku e premio di segundo lugá i Gandy Mauricio a sali e ganador apsoluto ku un skor di 197 punto i a bai ku e premio maksimo. Pa e torneo aki a skohe pa e método di “hits” pa e skor. Aki e tiradó deportista mester trata na skor mas tantu punto posibel dentro di 4 minut i pa despues dentro di 1 minut tira riba 5 blas. 

Na final di e kompetensia, e tesorero i tambe sekretario di Tirabon, señor Eric Soleana i Jadyr da Silva Piloto a hiba palabra felisitando Gandy i gradisiendo tur partisipante.