KRALENDIJK – Representantenan di e entidatnan públiko, direktiva di skolnan, sindikatonan i personal di enseñansa di Boneiru, Sint Eustatius i Saba a firma un akuerdo di kondishon laboral nobo den e siman ku a transkurí. 

Den e akuerdo nobo tin stipulá ku a hisa e montantenan salarial ku 4,2%. E oumento salarial ta drenta na vigor ku forsa retroaktivo entrante promé di sèptèmber 2021. Ademas personal di enseñansa ta risibí un bia un pago bruto di $500 segun proporshon pa tur hende ku riba promé di sèptèmber 2021 tabata den servisio i riba promé di mart 2022 ainda ta òf tabata den servisio. Pa Sint Eustatius i Saba ta komplementá e pago akí ademas ku e asina yamá ‘Bovenwindentoelage’ òf ‘Vereveningsbijdrage’. 

E akuerdo nobo ta aplikabel pa tantu e personal di enseñansa komo e personal di apoyo di enseñansa, i ta konta pa e periodo di promé di yanüari te ku 31 desèmber 2023. Entre fin di 2022 i komienso di 2023 lo determiná si tin espasio disponibel pa mas desaroyo salarial.
Ademas den 2022 ta tuma un desishon tokante kon ta invertí e plakanan di e Programa di Edukashon Nashonal (NPO) pa rekuperashon i desaroyo di enseñansa durante i despues di corona.
Tambe ta palabrá den 2022 i 2023 kon ta bai repartí e rekursonan pa kompensashon di merkado laboral. NPO a pone e plakanan akí disponibel pa kapasitashon i desaroyo ku debí na corona ta (a bira) nesesario.
Pa loke ta trata e areglo di penshun i e penshun di invalides, e palabrashonnan ku a keda hasí anteriormente pa ámtenarnan ta konta tambe pa e personal di enseñansa.

Durante e tempu ku e akuerdo nobo ta na vigor, e partidonan ta bai traha tambe riba mas profeshonalisashon di partisipashon. Ta intenshon pa amplia e Lei Partisipashon Skolnan pa skolnan na Hulanda Karibense tambe. Komo parti di e kampaña pa mas profeshonalisashon, e konsehonan di partisipashon di skolnan na Hulanda Karibense ta haña tambe derechi di aprobashon i konseho den futuro.
I finalmente lo sigui profeshonalisá e konsulta di kondishonnan laboral mas durante e temporada den kua e akuerdo nobo ta na vigor.