KRALENDIJK- Despues di un avalansha di krítika, Fundashon Mariadal (FMD) ku sierto regularidat a kuminsá duna informashon tokante e situashon ku botikanan na Boneiru.

Segun FMD ta splika awor, e seramentu temporal di e botika na hòspital a dura mas tantu tempu ku inisialmente a pensa. “E seramentu temporal tabata nesesario pa traha espasio pa hòspitalisashon di pashèntnan di Covid. Entretantu tabatin reapertura di e botika i e ta ofresé tantu e servisionan regular komo ahustenan nobo ku enfoke riba nesesidat di kliente”, asina e Fundashon a splika. Segun FMD mes ta bisa, awor ke duna un splikashon tokante desishonnan anterior i e situashon aktual.

Edifisio

Na aña 2020 promé ku Covid ya kaba Fundashon Mariadal a pone sierto pasonan pa realisá un edifisio nobo. Esaki tabata nesesario pa amplia su servisionan i hasi nan mas aksesibel. Un edifisio nobo tabata nesesario tambe pa botika di hòspital, konosí tambe komo Botika Playa.

Sinembargo, banda di e echo ku Covid tabatin un efekto negativo riba e entrega planiá di e edifisio, na fin di aña 2021 i na kuminsamentu di aña 2022 Fundashon Mariadal mester a krea kapasidat pa hòspitalisashon tambe pa e fluho di pashènt di Covid. Pa e motibu akí botika di hòspital tabata será temporalmente i tabata ofresé servisio na otro manera. Por ehèmpel pa medio di un empleado ku tabata buska resèpt na e dòkter di kas i hiba esakinan na e botika di eskoho.

Segun FMD ta bisa, tabata anunsiá esaki via prensa regular i medionan sosial. Banda di esei Fundashon Mariadal a pone klientenan i stakeholdernan na altura tambe di e konsekuensianan di e seramentu temporal.

Reapartura

Resientemente reapertura di botika di hòspital a tuma lugá. A anunsiá esaki via un komunikado di prensa kaminda Fundashon Mariadal a ofresé su diskulpa na su klientenan pa motibu di e seramentu ku a dura mas tantu tempu i e inkonveniensia ku esaki a kousa.