KRALENDIJK – Resientemente pa di dos biaha na Boneiru a someté un pashènt na un prosedura médiko úniko. Durante un operashon den hòspital di Fundashon Mariadal un siruhano di Sentro Médiko Universitario Amsterdam riba distansia a opservá e operashon. Esaki a sosodé pa medio di ‘smart glasses’ (un brel inteligente) di manera ku durante e operashon sosten digital direkto a tuma lugá.

Esaki ta un primisia médiko pa e islanan den Reino. Siruhano Ralph Gadiot di Fundashon Mariadal a realisá un laparoskopia (kijkoperatie) di barika kaminda e tabatin ‘smart glasses’ bistí. Di e manera ei siruhano Jurriaan Tuynman na Sentro Médiko Universitario Amsterdam por a opservá e operashon. E konklushonnan di e operashon akí ta di gran balor pa e tratamentu mas aleu. E mesun anochi ya kaba e pashènt tabata na kas.

Danki na e evaluashon riba distansia probablemente e pashènt por haña su tratamentu adishonal mas rápido na Sentro Médiko Universitario Amsterdam. E siruhano na Amsterdam ya kaba a mira e apdómen, e parti paden di e barika, sin ku e mes tin ku ehekutá e laparoskopia (kijkoperatie).

A informá e pashènt adelantá i el a duna pèrmit pa esaki. E informashon digital ta kompletamente sigurá di parti di fabrikante di e brel. No ta fail e informashon akí ningun kaminda pa di e manera akí garantisá privasidat di e pashènt. Pa medio di e manera di traha akí por formulá un plan di tratamentu adekuá mas rápido. No tin mester di manda e pashent Hulanda pa esaki. Esaki tin bentaha grandi pa tantu e pashènt komo pa e tim ku ta dun’é tratamentu. Fundashon Mariadal ta bai investigá mas aleu kon por hasi uso di e teknologia akí den futuro pa di e manera akí sigui mehorá kuido pa habitantenan di Boneiru i nos islanan besiña.

A pone e potrètnan disponibel ku pèrmit di e pashènt i e siruhanonan.