Kralendijk – Dia 20 di aprel e departamento di Diálisis di Nir na Boneiru ta eksistí 10 aña. Promé ku esei pashèntnan mester a bai Kòrsou pa tratamentu. Afortunadamente e periodo ei ta algu di pasado, pasobra biba ku problema di nir ya ta basta difísil kaba.

Boneiru tin 32 pashènt di diálisis. E pashèntnan ta eksperensiá vários efekto sekundario di nan terapia, pero diálisis ta nesesario pa keda na bida. Pa e motibu akí hopi pashènt ta bisa: ‘Dialisá no ta un bida, pero mas bien bo ta bezig ta sobrebibí’. Sra Johanna Cicilia i sr Biniano Emerenciana ta dos pashènt ku ainda tabatin ku biaha pa Kòrsou pa nan tratamentu. Seis aña largu, tres dia pa siman, bai mainta i si tin kontratiempo bolbe Boneiru bèk te anochi. Nan ta hopi kontentu ku awor akí nan por dialisá na nos isla mes. Tur dos ta haña ku konsientisashon bou di habitantenan tokante problema di nir ta importante. E pashènt Narcissa Castillo ta uni su mes ku esei. ‘Kuida bo kurpa i nirnan bon, purba biba mas saludabel ku ta posibel!’

E departamento di diálisis ta disponé di un tim di enfermero i enfermera ku hopi eksperensia. Tin ora trabou na departamento di diálisis ta ketu i trankil, pero por ta hopi drùk, eksigente i kompliká tambe. E enfermero i enfermeranan ta haña plasentero pa traha den un tim chikitu. Bo ta risibí e pashèntnan ku un kòmbersashon kòrtiku i bo ta duna nan guia i instrukshon. Tin pashènt ku tin mas difikultat ku un otro. Importante ta pa nan tene nan mes na nan dieta i no bebe muchu hopi líkido. Famia ta importante pa duna sosten. Ora ku bo nirnan no ta funshoná bon, de fakto henter bo famia tambe ta malu ‘huntu ku bo’. Na momentu ku e pashèntnan no ta sinti nan mes bon, esei no ta solamente fastioso pa nan mes, pero pa nan famia tambe.

Te ainda un malesa di nir ta nifiká un infrakshon grandi riba partisipashon na un bida sosial. Un restrikshon pa loke ta trata líkido no ta nifiká solamente ku hopi biaha bo tin set, pero tambe ku bo tin ku nenga kos di bebe, pasobra ta hopi rápido ya kaba bo a alkansá e límite di ún liter.

Awe nos ta para ketu na e impakto ku nir ku no ta funshoná bon i diálisis tin riba nos pashèntnan. Nan bida ta dependé di e diálisis i no tur ora por mira esei di parti pafó. Sosten i komprenshon di famia, amigu i henter nan alrededor ta importante.