KRALENDIJK- Giovannni Mercera awe  atardi a hasi apertura ofisial di skol di músika ‘GM Music Center’. Ta un persona bon konosí den komunidat di Boneiru, komo músiko. 

El a  konta ku e tabata na Hulanda i e idea a nase pa e kuminsá ku un skol di músika na Boneiru. E meta ta pa e pasa su konosementu den músika pa otronan. No ta importá mucha òf mayor di edat el a bisa.  ”Danki na Dios pa awe mi ta aki i por hasi loke mi gusta i a hasi tur posibel pa logr’e. E trayekto a dura por lo ménos 8 luna. Esaki ta e komienso i tin hopi plan mas pa agregá pe proyekto.  

Tin un studio pa por atendé ku grabamentu di músika. No solamente mi persona, sinembargo tin mas hende ta bai duna lès di músika na GM Music Center”, Giovanni a bisa.  

Pastor Daniel Drullard a konta kon Giovanni a bai biba Hulanda i e tabata un persona hopi kerí den e mundu di músika. “El a regresá awor ku mas plan pa mas desaroyo den e mundu di músika na Boneiru. Un persona ku ta hasi kos sin buska benefisio propio.” Despues a hasi orashon pa gradisí señor pa e skol di músika ta un éksito pa Boneiru.

Meta

Giovanni a konta e meta di e skol di músika ‘GM Music Center’. Tin diferente instrumènt pa por siña toka i kanta. E sitio ta na Casa di Músika Bonaire pariba di misa di Playa. Audi Flores, ta un di esnan ku ta bai duna lès pa siña toka diferente instrumènt. El a konta kon nan a yega na e kombersashon pa e skol di músika.

Edel Pieternella tambe ta un persona ku ta bai traha na e skol di músika i el a ekspresá su apresio pa e idea di Giovanni Mercera.