KRALENDIJK- Un fin di siman yena di atleta entusiasma a kompetí den e di 18 edishon di Prokids Mega Sport Event. Inskripshon a sera ku 65 partisipante den kategoria di windsurf i sunfish. Djabièrne atardi 20 di mei ku hopi ánimo, partisipantenan a yega Parke Tului pa registrá ofisialmente pa kompetí den e evento tan spera.

Ku un total di 65 partisipante, djasabra mainta a hasi apertura ofisial ku algun representante di sponsornan presente pa zona e pitu. Representante di TELBO, Phar Martha i tambe representante di diputado di deporte, Gissette Emers a duna palabra di sosten i enkurashamentu na tur e atletanan presente i e organisadornan. 

Presidente di Stichting Aquaspeed Bonaire Windsurfers señora Licetha ‘Liesje’ Saragoza akompañá pa e koordinadó general señora Derchlien Vrolijk ku tambe a duna palabra pa asina ofisialmente kuminsá ku e reunion di kapitan (skippers meeting) pa despues start ku e karedanan.

ProKids a gradesi tur esnan ku a yega Sorobon pa apoya i anima e atletanan.