KRALENDIJK – Diputado Nina den Heyer ta kontentu ku awe Tweede Kamer a bai di akuerdo pa pèrmití Scholengemeenschap Bonaire pa por ofresé entre otro e formashon pa kòki na nivel di MBO3 i MBO4 na papiamentu tambe. ‘Ku esaki nan a duna oido na un deseo ku ta biba ampliamente den nos komunidat, pero mi ta mira esaki komo un sierto rekonosimentu tambe pa nos idioma’, segun Den Heyer.

Ya ta 3 aña pasá kaba ku SGB a aserká ministerio di Enseñansa, Kultura i Siensia. A resultá ku un kambio di lei tabata nesesario, despues di kua Tweede Kamer tambe tabatin mester di hopi tempu pa fiha un punto di bista. ‘A dura mas tantu tempu ku nos a spera, pero afortunadamente awe un mayoria grandi den Tweede Kamer a vota na fabor. Esaki ta bon notisia pa e kòkinan ku ke haña un puesto mas haltu serka nan dunadó di trabou i pa e dunadónan di trabou den hóreka ku awor akí ainda hopi biaha mester buska trahadó for di den eksterior. Esaki ta un situashon kaminda nos tur ta gana.’

Mas lucha

E formashon pa kòki na papiamentu no ta e úniko ‘lucha pa idioma’ ku e diputado ta hiba. ‘E diskushon tokante esaki un biaha mas a suprayá kon importante ta ku ta inkluí nos idioma papiamentu den e Manifesto Oropeo pa idiomanan regional òf idiomanan di minorianan. Esaki ta nesesario pa logra ku ta rekonosé nos idioma papiamentu komo un idioma kompleto i digno ku ta meresé protekshon. Gobièrnu hulandes a primintí ku nan ta bai hasi nan bèst pa logra esaki. Mi ta keda vigilá pa sòru ku nan ta sigui traha riba esaki’, segun Den Heyer. 

‘Na Boneiru nos ta papia vários idioma, pero papiamentu ta e idioma ku ta konektá nos ku otro. Pa e motibu akí nos a hasi palabrashon ku gabinete hulandes pa lanta un organisashon ku ta bai dediká su mes na mantenshon i desaroyo mas aleu di nos idioma papiamentu. Banda di esaki nos aspirashon ta ku na aña 2030 tur mucha tin bon dominio di nos idioma ora nan bandoná skol básiko’.