KRALENDIJK- Djaweps a tuma lugá apertura ofisial di ‘Sentro Akseso Bonaire’. Ta trata di un lugá ku ta yuda tur hende for di 0 te na 100 aña di bida. Tur hende na Boneiru tin derecho riba un bon bida. Esei entre otro Akseso ta para pe.  

“Porfin nos a yega i mi ta masha orguyoso. Sigur e meta tras di e organisashon aki, ta masha importante pa e komunidat. E tim di Akseso ta stabil i kos no por bai robes ku esnan rondó di sentro.
Importante ta pa nos kliente, nan tambe sinti nan na kas na e sentro. E trabou ta rekerí amor pa yuda i mi ta sigur ku e tim aktual tin esei pa e trabou”, asina diputado di asuntunan sosial Nina Den Heyer a bisa.

Direktora di komunidat i kuido,  Silvana Janga-Servilia, a splika ku e proseso pa yego na Sentro Akseso no tabata un kaminda fasil. “Ku hopi forsa, kurashi i perseveransia, tur ku a traha, a pèrkurá pa nos a yega kaminda nos ta awe. Pabien na boso”, asina Janga-Servilia a bisa.
 
Direktor nobo

Presidente di hunta di supervishon di Sentro Akseso Boneiru, Anthony Nicolaas a papia di tur esnan ku ta forma parti di Akseso. “Na 2011 a lanta Sentro di Hubentut i Famia. Awe atrobe tin apertura di un organisashon poko mas amplio. E idea tabatei hopi aña pa bin ku algu manera esaki. Nos ta e representante di e pueblo. Nos mester nombra un direktor. Chris Palm a disidí di tuma retiru pronto. Awor mester di un kapitan nobo pa dirigí e trabounan. Nos a buska sinembargo no tabata fásil. Nos a yega na un posibel kandidato. Hunta di supervishon a disidí di nombra Henry Breeveld, direktor nobo pa Akseso”, asina Nicolaas a splika.