KRALENDIJK- Fundashon lesa ta dushi a organisá e di 8 kompetensia di lesa Bòi Antoin djasabra ku a pasa. 10 mucha a kompetí den e kompetensia.

Muchanan ku kurashi a lesa masha bunita durante e kompetensia. Públiko presente a aploudí kada un pa nan presentashon. 5 mucha a kompetí di 8 pa 10 aña i despues a sigui ku esnan di 11 pa 12 aña. 

Diputado Nina Francees-Den Heyer tabata presente i el a bisa  e gusta lesa i lesamentu ta hopi importante pa mucha. “Bale la pena ripití un aktividat manera esaki. Banda di lesamentu, ta organisá arte di palabra i nos muchanan ta bai partisipá i ta ekspresá tremendo talento. Muchanan; sigui lesa.”

Promé ku a saka e ganadónan, a hasi entrega di un regalo pa Jaedan Crestian, e hóben ku for di prinsipio a kuminsá kanta himno na komienso di e kompetensia. El a kontinuá tur aña. Debí ku e no ta na Boneiru, su mayornan a tuma e premio.

Ganadó

Presidente di fundashon lesa ta dushi, Mazarella Katan Jansen a dirigí palabra i despues a saka ganadónan. Edat 9 pa 10 aña: ganadó Kolegio Kristu Bon Wardadó, Daenly Lauffer, 2 lugá: Kolegio Rayo di Solo Skye Veriel i na di 3 lugá Caylee Cicilia di De Pelicaan.  

Ganadónan 11pa 12 aña: Kolegio Kristu Bon Wardadó Wilmer Saragoza, na di 2 lugá Kolegio Rayo di Solo Kayliandra Rosario i na di 3 lugá Kolegio San Luis Betran Andres Vera Chacon.