KRALENDIJK – Djaluna 27 di yüni 35 mucha di grupo 6 i 7 di Kolegio San Bernardo a duna nan promé presentashon huntu ku e dosentenan di Leerorkest Bonaire. Despues di 5 luna di lès di téoria di musika ku a wòrdu duná dor di sr. Dennis Aalse i lès di kantamentu ku a wòrdu duná dor di yùfrou Chaira Borderslee tabata nan bùrt di briya ku diferente kantikanan pa mucha.

Despues di fakansi e muchanan ta bai haña lès di instrumènt di orkesta tambe. Pa esaki e ‘instrumentendepot’ di Leerorkest Amsterdam a pone diferente instrumènt disponibel, manera trompèt, trombon, klarinèt, flauta, hoorn, kontrabajo i drùms. Nobo e biaha aki ta e fio, cello i pauken.

Leerorkest Bonaire ta wordu kordina dor di Fundashon Mangazina di Rei ku finansiamentu di Ministerio di Seguridat i Hustisia/Enseñansa i Sensia. Pa e ministerio ta hopi importante pa tin aktividatnan positivo kaminda muchanan por deskubri nan talento i pa evitá ku nan ta bai ferfela nan mes. Meskos ku deporte, musika ta hasi mucha mas fuerte i felis. Esaki ta krea un bon base pa nan futuro. Pa mas informashon por bishita e pagina di facebook di Leerorkest Bonaire.