KRALENDIJK- Bonaire Sport Federatie (BSF) ta hopi preokupá pa e efekto di e impuesto nobo pa bishitante, Visitor Entry Tax, riba deporte na Boneiru. 

Den un karta ku BSF a skibi pa Kolegio Ehekutivo, ta ekspresá e miedu ku hopi di e trabounan duru di añanan ku a pasa lo bai pèrdí si atletanan mester paga esaki tambe, meskos ku turista. ‘’Komo representatie di mayoria federashon deportivo aki na Boneiru, nos kier a informá ku despues di a bai buska informashon i a konsultá, a bin resultá ku e impuesto aki lo hasi un daño grandi na deporte’’, asina presidente di BSF, Eric Soleana, a skibi

Soleana ta mustra tambe ku ya no ta fásil pa deportista yega Boneiru pa kuminsá, e si mester paga e montante di sea 10 dòler pa e islanan ruman, òf 75 dòler pa esnan ku ta bin for di mas leu, esaki sigur lo ta bai ti un impakto negativo. 

Eksonerashon

Ta pesei Soleana, den su karta, ta hasi un apelashon riba Kolegio Ehekutivo pa eksonerá atletanan ku ta bin bishitá boneiru for di e Visitor Entry Tax aki.