DEN HAAG – Studiantenan di Karibe ku ke bai studia na Universidat Liber (VU) na Amsterdam i ku pa otro siman 1 di ougùstes 2022 no tin un kamber ainda, mester rekonsiderá nan estudio einan. Esei e universidat ta rekomendá kada studiante estranhero, segun Het Parool.

For di inisio di aña e insituto edukashonal ta informando interesadonan ku ta difísil pa haña un kamber den e kapital. Tantu Universidat di Amsterdam komo Universidat di Utrecht ta hasi yamadanan similar.

Studiantenan di Karibe ku ta bai Hulanda via e organisashon di finansiamentu di estudio, tin un kamber ku e organisashon a perkurá p’e.

Sentro di informashon Kences a informá na komienso di e aña di estudio anterior ku mas ku 26.000 studiante no a haña un kamber. Ta p’esei por ehèmpel Universidat Internashonal di Twente for di e tempu ei kaba a konsehá studiantenan ku no por a haña un kamber pa rekonsiderá pa bai hasi nan estudio den otro siudat.

E kantidat di studiante internashonal na kolegio- i universidatnan Hulandes a oumentá e aña di estudio anterior ku 12 porshento, e organisashon Nuffic ta informá. En total tabatin 115.000 studiante di otro pais inskribí na kolegionan. E parti di Karibe den e kaso aki ta limitá; ménos ku mil studiante Karibeño ta bai Hulanda anual pa studia. 

Mientrastantu e kantidat di kas nobo pa studiantenan ta keda atras riba e demanda, ku konsekuensia ku e skarsedat na kamber lo sigui oumentá. Studiantenan internashonal mayoria bes no tin un ret ainda den Hulanda ku nan por kai bèk riba dje.