KRALENDIJK—Djadumingu mardugá alrededor di 2 ’or, a saka ganadónan pa Reina, tiner, Reina, Prens i Pancho. Un anochi largu pa yega na e final, pero UNTAHF por mira bek riba un bunita aktividat. 

E tereno na Social Cafe tabata yen di hende pa apoyá e partisipantenan. Un momentu mester a para e presentashonnan, esaki debí ku áwaseru a kai i mester a ahustá e situashon pa por a sigui despues di e yobida.  

Diputado Nina Francees-Den Heyer a gradisí UNTAHF pa e bon trabou ku nan ta hasiendo. El a bisa e ta mira hopi hende gosando i kòrda pa sali kas seif e temporada aki tambe. E ganadónan di awe anochi ta un bon ehèmpel pa e temporada di karnaval. Ban nos tur pa gosa e fiesta di karnaval. Despues el a pone korona riba kabes di e Prens i Panchi pa karnaval 2025.

Ganadó

Reina di karnaval 2025 a bira Darnica Pourier, promé finalista Neika Eltine i di 2 finalista Shandelus Rosa. Reina di karnaval Tiner 2025 a resultá pa Ruedely Winklaar, promé finalista Aquinah Booi, di 2 finalista Zoe Gomez.

Prens i Pancho 2025, Prens Jeaniro Dorothea i Pancho Raynolds Wilsoe. Promé finalista a resultá Jeremy Craane i Rainiger Goeloe, di 2 finalista Rogelio Abrahams i Jofrey Martis i di 3 finalista Kevin Janga i Jerney Martis.