KRALENDIJK- A establesé e Federashon Dutch Caribbean Mental Health ofisialmente dia 17 di desèmber 2024. E federashon aki ta resultado di un kolaborashon úniko entre FSMA Respaldo (Aruba), GGZ Curaçao, Verslavingskliniek Brasami (Curaçao), PSI Skuchami (Curaçao) i Mental Health Caribbean (Bonaire, Sint Eustatius i Saba). 

Mental Health Foundation (Sint Maarten) a indiká ku e organisashon lo djòin e kolaborashon aki riba un fecha mas despues.

E meta prinsipal di Federashon Dutch Caribbean Mental Health ta pa promové kuido di salú mental di kalidat haltu i ku ta aksesibel riba tur isla den e parti Karibense di Reino. Dor di uni forsa, e organisashonnan afiliá ta krea un plataforma sólido pa kolaborashon, inovashon i kresementu sostenibel. E esfuerso konhunto aki ta kontribuí na kuido fihá riba futuro ku un impakto positivo riba klientenan, profeshonalnan di kuido i komunidatnan den e region.

E federashon ta enfoká riba oumentá e kalidat i desaroyá kuido mas aleu. E ta enkurashá tambe e kompartímentu di ekspertisio organisatorio i pa loke ta trata kontenido. E federashon ta komprometé tambe na fortalesé maneho i legislashon ku ta kumpli ku e nesesidatnan úniko di e region i na profeshonalisashon di personal di kuido pa medio di estudio i edukashon, manera e estudio di ‘Gezondheidszorgpsycholoog’ pa Karibe.