KRALENDIJK – Djabièrnè 10 di novèmber, tabatin e último aktividat pa e siman di enkuentro ku tabatin di Mantelzorg. 

Jefferson Rosalia a hasi e parti di apertura riba e dia i a guia e programa. Esaki tabata den kuadro di e selebrashon ofisial di Mantelzorg tur aña, e fecha 10 di novèmber. Ta pone tur aña e Mantelzorg den lus i kompartí informashon balioso un ku otro. Nan tambe ta konta den bida, esta e Mantelzorg, ku hopi biaha no ta haña un danki. Diana Thomas ta e direktor i despues ku el a hasi e parti ofisial, Jefferson a sigui. El a splika un eksperensia di hopi ruman i 1 mester a tuma enkargo di tuma mama pa sigui ku e ayudo. “E trabou ku bo ta hasi, bo no ta mira e bendishon, bo no ta mira e ganashi. Bendishon ta bini despues. Si bo hasi bon bon ta bin bèk.

Tin biaha hende ta kere, wak òf pèrkurá pa mama i tata ta normal, pero e tin su reto nan. Si bo no realisá na tempu pa bo ta stabil, bo ta kai na kaminda. Sali kas ku e adulto mayó. Si el a kustumbrá sali i direpente e no ta move mas e kos ta afekt’é, “un parti di loke Jefferson, a trese na e okashon.  

Diputado Nina Francees-Den Heyer tambe a bisa kon el a kuida su wela. “Nos tur tin ku pasa den esei. E bendishon tei. E bendishon ta bini di otronan. Sigui pa kita e tabú di esaki. Un aplouso pa boso mes. Sigur nos ta bai hasi mas komo gobièrnu den e área aki, kon ta yuda nos mama i tata, momentu nan bira adulto mayó.”

Diferente persona a lanta para i ekspresá nan eksperensia i algun no por a dominá nan emoshon i a yora kontando loke nan ta pasa aden. Nan a bisa: “Mi tin mas ku 2 aña ta atendé ku mama. Tin momentu dushi pero tambe tin momentu di strès. No ta kos fásil i siguiendo e 4 dia di informashon, mi a siña hopi.

Otro nan a konta kon nan a bai laga famia atras na Hulanda, pa kuida mama i tata na Boneiru. “Bo mester tin hopi amor pasenshi. Bo ta hasi hopi trabou i no ta haña danki. Ta importante pa kuida bo mes pa bo ta stabil pa bo kuida e otro.”

Rekonosimentu

A pone den lus i regalo riba Barbara Griot beleids adviseur i a traha inkansabel. Tambe Linda Janga boluntario, Lucia Anthony tambe komo boluntario.

Ruthilne  Bernabela a gana un pasashi pa bai Kòrsou. Dia 10 di novèmber ta dia ofisial di Mantelzorg, i ta pone tur den lus i kompartí informashon balioso ku otro. Diana Thomas, direktor di Mantelzorg Bonaire a keda hopi satisfecho ku e manera ku e siman a kana.