E kresementu rápido den pashentnan sufriendo di COVID a kondusí na un falta grandi di enfermero i enfermera ku por traha riba departamento di Kuido Agudo (Acute Zorg). 

E instituto di formashon di Universitair Medisch Centrum Amsterddam (UMC) VUmc Acedemie de e krisis kousá pa COVID-19 a mira un posibilidat pa bin di forma relativamente rápido ku un kurso spesialisá riba e tereno di Kuido Agudo ku e alianza di hospitalnan di Karibe Hulandes, Dutch Caribbean Hospital Alliance (DCHA U.A. i.o.)

Finansiamentu di e ministerio VWS a hasi e kurso Basis Acute Zorg (BAZ) posibel i un realidat. Mas ku 100 enfermero i enfermera di 5 isla Hulandes-karibense a kuminsá ku e kurso aki. Dia 28 di mart, e promé 31 kursista lo risibí nan sertifikado, durante un ceremonia ku lo mira presensia di e sekretario di estado pa Salubridat Públiko, bienestar i deporte di Hulanda (Maarten van Ooijen), i ministernan di Salubridat Públiko di Aruba (Dangui Oduber), Kòrsou (Dorothy Pietersz-Janga) i Sint Maarten (Otmar Ottley). 

Programa

Un parti di e kurso ta tumando lugá di forma digital, mientras ku tin diferente dosente for di práktika presente na e diferente hospitalnan. Según e organisadónan e tempu kòrtiku den kua a logra organisá e kurso na ambos Ingles i Hulandes ta úniko.