KRALENDIJK – Trabou a kuminsá pa e di dos parti di e proyekto, pista pa pone fever i dragrace. Manera ta konosí, resientemente a pone asfalt riba e parti di e tereno ku ta destiná pa ponementu di fever i for di wikènt pasá, a kuminsá ku rosamentu di mondi den e área pariba di e pista pa fever. 

Ya tin un distansia hopi largu rosá i a saka e ramanan ku trùk pa pone nan na otro sitio. Si tur kos sigui kana manera ta bai, denter di 1 pa 2 siman, e tereno ta kla pa kuminsá ku preparashon pa konstrukshon di e pista pa dragrace, esta kaminda 2 vehíkulo por pusta banda di otro, un distansia di 400meter. 

Terrence de Jongh, hefe di INDEBON, a keda pa papia e siman aki, tokante kon ta bai atendé ku e pista pa fever, , ku ta praktikamente kla pa pone den operashon. Ta kere ku e lo menshoná tambe, e dia ku ta organisá e promé evento riba e pista pa fever. Na e okashon, lo hasié pregunta tokante e desaroyo, e parti ku a kuminsá rosa awor, pa traha e pista di dragrace.