KRALENDIJK – Siman pasá, tabata siman di Integraal Kind Centrum (IKC). Esaki ta un konsepto ku 5 aña pasá, diputado Nina den Heyer, a introdusí. 

IKC ta un sentro kaminda Skol, Sentro pre-eskolar i akohida despues di skol, ta tuma lugá bou di un dak, ku meta pa ofresé un liña di desaroyo kontinuo, unda profeshonalnan por komplementá otro, traha efisiente huntu i ekonomisá. 

E aña aki ta 5 aña, ku IKC Rincon, ta traha uzando e nòmber aki. Hopi hende no sa kiko e ta enserá. Pa e motibu, tabatin un siman di IKC ta sirbi unda por promové e sentro i laga e pueblo sera konosí ku nan i nan desaroyonan. IKC Rincon a hasi esaki den e siman di 16 pa 20 di òktober.

Tabatin diferente aktividat pa mayor, alumno i trahadó. Pa promé biaha na Boneiru, tabatin un enkuentro ku partners i komersiante na skol, pa laga nan konosé ku e sentro i purba stimulá un partisipashon entre skol i komunidat. Tica Koeks, kabesante di e proyekto na IKC, a papia durante e enkuentro, splikando kon e skol ta funshoná, di chikitu pa grandi. Tres deportamentu bou di 1 dak.

Tambe a papia di e distansia di te Rincon i a splika ku esei no ta leu, sigur no pa kompará e distansia ku nos islanan ruman. 

Desishon

Robert Croes, un di e invitadonan presente, a splika kon e i su señora, a yega na e idea pa hiba nan yu skol na Rincon, miéntras nan ta biba na Playa. Nan a yega na e desishon, pa laga e muchanan bai skol na Rincon. “E skol ta bon, un ambiente trankil i nos ta sinti konfortabel pa e muchanan. E muchanan ya a sosialisá ku e skol i ta biba ku e kultura di Rincon. Ami i mi famia ta apresiá e trabou di e skol. Tin hende ta puntra mi, te Rincon e muchanan ta bai skol? Nos ta bisa nan, sigur ku si,” Robert a bisa.

A menshoná tambe ku e famia ta kontribuí na e skol i no ta konsider’é komo spònser. Tabata un siman eksitoso i IKC Rincon, ta gradisí tur esnan ku a partisipá. Riba potrèt, durante e enkuentro, ku e parnersnan.