KRALENDIJK – For di 16 di òktober 2023 angua anual kontra grip ta disponibel atrobe. Hende den e gruponan di riesgo por tuma kontakto ku nan dòkter di kas pa traha un sita pa pasa e angua grátis. Djasabra 28 di òktober por pasa angua entre 9 ‘or di mainta i 12 ‘or di merdia, sin traha sita serka nan dòkter di kas. 

Segun e departamento di Salubridat Públiko di Entidat Públiko Boneiru (EPB) hende riba 60 aña ku tin problema médiko, manera diabétis, un malesa di kurason, pulmon òf nir, òf ku tin ménos resistensia , ta kore mas riesgo di salú ora nan haña grip. Si un hende pasa e angua kontra grip, su kurpa ta reakshoná trahando antikurpa pa e vírùs di grip. Esei ta pone ku e chèns pa haña grip ta bira ménos. Por sosodé ku e persona akí tòg ta haña grip. E angua kontra grip ta sòru ku si e persona bira malu, esei ta ménos grave. I e ta redusí e chèns di haña problema serio manera pulmonia òf problema di kurason. 

“Pa un bon protekshon, hende mester pasa angua kontra grip tur aña di nobo. E mihó manera ta pa hasi esaki promé ku komienso di e temporada di grip, ku mayoria biaha ta kore di desèmber pa mart. Despues ta dura mas o ménos dos siman promé ku e angua kontra grip kuminsá traha”, asina Salubridat Públiko ta informá.

Grip ta plama di mes manera ku COVID-19. “P’esei tosa i nister den èlebog òf den un lensu di papel i laba man regularmente ku awa i habon. E angua kontra grip ta protehá solamente kontra e vírùs di grip. Pues persona ku pasa e angua kontra grip, no ta protehá kontra otro vírùs manera e vírùs di ferkout, òf e vírùs di corona”, asina e departamento ta informá.

Entre 60 i 80 aña 

E aña akí tambe, meskos ku na Hulanda oropeo, dòkter di kas ta bakuná persona entre 60 i 80 aña kontra neumokoko. E angua ta redusí e chèns ku bo ta bira gravemente malu i haña por ehèmpel pulmonia. Por pasa e angua kontra neumokoko pareu ku angua kontra grip.  

Tuma kontakto ku bo dòkter di kas pa wak si bo ta bin na remarke pa e angua kontra grip i/òf e angua kontra neumokoko. Departamento di Salubridat Públiko di Entidat Públiko Boneiru i dòkternan di kas ta traha huntu pa pasa angua kontra grip i neumokoko.