KRALENDIJK – Djamars 29 di ougùstùs, direktor di INDEBON, Terrenece de Jongh tabata tin un enkuentro ku diferente instansha pa informá nan loke ta bai tuma lugá riba e pista pa fever na altura di Onima. 

Polis di tráfiko tabata presente, miembro di kuerpo di bombero, personal di ambulans i organisadónan di e aktividat riba e dia. Un representante di gezaghèber, tambe tabata na e sitio, e mainta di informashon. 

E presentenan a reuní pa mas ku 2 ora na e sitio, kaminda e aktividat ta bai tuma lugá, pa deliberá riba diferente aspekto. 

Dia 10 di sèptèmber awwor ta bai tuma lugá apertura di e pista pa pone fever i despues ta sigui ku un show ku diferente vehíkulo. Deseo di tur esnan presente tabata, pa spesialmente koredónan di motosaikel, ban stòp ku hasimentu di bochincha riba kaya. 

Selebrashon 25 aña

INDEBON a skohe e fecha menshoná, pa apertura, den kuadro di selebrashon 25 aña, e paseo ku motosaikel na Boneiru, durante e fin di siman, di dia di Boneiru. E fin di siman aki, ta bai tin hopi hende ku nan motosaikel for di Aruba i Kòrsou. Ta islanan, kaminda Boneriano semper a bai kompetí den e deporte, ku outo i motosaikel, pa fever i dragrace. Mas serka 10 di sèptèmber, INDEBON ta duna mas informashon di e aktividat.