WILLEMSTAD – Djesocho aspirante di Wardakosta a finalisá djabièrnè siman pasá e Kurso básiko pa Wardakosta (BOK) ku éksito despues di kuater siman di introdukshon intensivo. Ta trata di aspirantenan di Aruba, Kòrsou i Sint Maarten.

Durante e simannan di introduskshon e hóbennan a sigui lèsnan klasikal durante kuater siman bou di guia di nan instruktor i a eksperensiá diferente kampamentu di sera konosí.

Ehersisio final

Durante di e kampamentunan e aspirantenan a kana hopi kilometer, landa hopi, kushiná nan mes, i diferente aktividat mas. Nan ehersisio final pa e simannan di introdukshon a kuminsá djaweps anochi. Nan mester a marsher i rema riba laman ku destino final base di marina na Parera riba djabièrnè mainta. Riba base di marina na Parera trahadónan di Wardakosta i otro koleganan a risibí nan ku  aplous.

Despues e aspirantenan a risibí nan pèchi-BOK ofisial komo muestra di apresio pa nan prestashonnan durante di e simannan di introdukshon. E siman aki e aspirantenan ta kuminsá ku e módulo abilidatnan básiko manera entre otro EHBO i abilidat di tira. E módulo aki ta dura ocho siman.