CANBERRA – Federashon di futbòl di Australia a kontratá Guus Hiddink pa yuda ku e preparashonnan pa WK na Qatar. E Hulandes di 75 aña ta bai asistí e entrenadó di e ekipo nashonal  Graham Arnold otro luna durante e partido amistoso dia 22 di sèptèmber  na Brisbane kontra Nueva Zelandia.

Hiddink tabata guia Australia komo entrenadó di e ekipo nashonal pa e WK di 2006 na Alemania. ‘Socceroos’ a partisipá pa promé biaha den 32 aña na e buelta mundial final i asta a alkansá oktavo final, kaminda nan mester a hunga kontra Italia ku a sali kampion mundial ku skor di 0-1. 

Resientemente Hiddink a stòp komo direktor tékniko di e federashon di futbòl nashonal di Kòrsou pa motibu di problemanan organisatorio na Kòrsou.

En prinsipio ta trata aki di un regreso kòrtiku di Hiddink. E ta remplasá kompatriota René Meulensteen, e asistente fast di e entrenadó di e ekipo nashonal Arnold, ku durante di e weganan amistoso na sèptèmber ta keda Europa pa opservá e kontrinkantenan di WK Fransia i Dinamarka.