KRALENDIJK – WEB Boneiru ta anunsiá ku tarifanan nobo a ser stipulá pa e periodo kuminsando for di 1 di novèmber 2022 pa un periodo di 2 luna. E tarifanan lo baha danki na un supsidio fasilitá pa Openbaar Lichaam Bonaire (OLB).

OLB ta pone e supsidio aki disponibel komo kompensashon pa e subida ku a bai na vigor entrante 1 di yüli 2022. E supsidio aki ta bini riba e supsidio eksistente di ministerie EZK. Ku esaki ta pone e tarifanan di uso fiho riba sero i ta duna un deskuento di USD 0,0350 pa kWh riba e tarifa di uso variabel.

Basá riba esakinan lo apliká e siguiente tarifanan nobo pa elektrisidat entrante 1 di novèmber 2022 pa un periodo di 2 luna:

Tarifa variabel (post-pago): USD 0.3903 pa kWh Tarifa di Pagabon (pre-pago): USD 0.3903 pa kWh Tarifa di uso fiho: USD 0 pa luna (òf pa kVA pa luna)

E kambio di tarifa ta visibel riba e fakturanan for di periodo di uso ku fecha di inisio pa uso di novèmber 2022. Pa usuarionan pre-pago (Pagabon) e tarifa adaptá ta dirèkt visibel for di 1 di novèmber 2022.

E tarifanan entrante 1 di yanüari 2023 lo keda publiká despues ku ACM stipulá e tarifanan definitivo i supsidio.